بو عشق دردو غمی گؤر نئجه یوغورتدو منی
قیامتین ائله بیل آتشی قووردو منی
یاراما بخیه وورارلار فقط نه فایداسی وار
طبیبیم اولدو او کس کی ائله او قیردی منی

اگر اینسان حکیم اولسا ، اسیر روزگار اولماز
بو بئش گون عمره خاطیر ، نفس شومه دستیار اولماز
سلیمانلار گئدیبلر دست خالی قبره دونیادان
نقدیر اولسا اینسانین جلالی ، پایدار اولماز

چیرپینما اوره ییم دؤیونمه قلبیم
کیچیلمه دوشمنه اییلمه یادا
اودلار اؤلکه سینین اوجالیب باشی
دئییلیر شهرتی بوتون دونیادا

چرخی فلک منله یامان باشلادی
نه چوخوموش آهی زاری دونیانین
باغبان اولدوم گیردیم دونیا باغینا
حئیف کی یوخوموش باری دونیانین

قمران گؤزلرینین قربانی اولوم
ماهیر اووچو کیمی منی ایزلییه ن
قمرال گؤزلرینین قربانی اولوم
سخته باخیشلاردان منی گؤزله ین
عشوه نازلارینین قربانی اولوم

اولدوم دلشکسته ای بویو بسته
الیم اته یینده ، یار اوزمه اوزمه
نه دیر سینه ن اوسته ، لب لری پسته
مروت ائت جانیمی ، یار اوزمه اوزمه

منیم قلبیم سیغارادان نازیک دیر
مروت ائت ، سینه می داغلاما گؤزل
حسرتیندان کؤنلوم ازیک – ازیک دیر
دوز سه پیپ یارامی باغلاما گؤزل